Charles Chaplin

Dr Sir Charles Spencer Chaplin jr., KBE, bekannt as Charlie Chaplin (* 16. April 1889 vermuetlig z London;^[1] † 25. Dezämber 1977 z Vevey, Schwiz), isch e britische Komiker, Schauschbiiler, Reschissöör, Komponist und Broduzänt gsi.

Dr Chaplin zelt zu de iiflussriichste Komiker vom 20. Joorhundert. Si bekanntisti Rolle isch dr „Vagabund“ (im Original „The Tramp“, au „Charlot“), en arme Landstriicher mit de Maniere und dr Würd vom ene Gentleman. Die Figuur mit em Zweifingerschnauz, de Hoose und Schue wo z grooss si, dr änge Jagge, em Bambusstock in dr Hand und dr Melone uf em Chopf isch zun ere Filmikone worde. S American Film Institute het dr Charlie Chaplin zur zäätgrösste amerikanische Filmlegände vo alle Zite gweelt.^[2]

Dr Charles Chaplin het si Karriere as Chind aagfange, won er in dr Music Hall ufdräte isch. As Komiker in de früeje Stummfilmkomöödie vo Hollywood het er bald groosse Erfolg ghaa. Er isch zu siner Zit dr beliebtest Stummfilmkomiker gsi und het s fertig brocht, künstlerisch und finanziell unabhängig z wärde. 1919 het er zämme mit dr Mary Pickford, em Douglas Fairbanks und em David Wark Griffith d Filmgsellschaft United Artists gründet. 1952 het män en verdächdigt, Kommunist z si, und dorum het er us em Usland nüme zrugg in d USA dörfe. Er het denn in Öiropa as Schauschiiler und Reschissöör gschafft. 1972 het er en Eerenoscar für si Lääbenswärk überchoo. Fümf Joor druf isch er im Alter vo 88 in si Schwiizer Woonort gstorbe.

1. ↑ Matthias Gretschel: Die Geheimdienstakte Charlie Chaplin, Hamburger Abendblatt, 18. Februar 2012, abgrüeft am 18. Februar 2012. Vergliich au KV 2/3700 im britischen Nationalarchiv
2. ↑ American Film Institute's list of the 50 Greatest American Screen Legends